Non a los papelonos

Caberamente, aconceyen manifestaciones na llende d'Arxentina y Uruguai, tarazando'l tráficu, berrando y faciendo estremullina, col envís de glayar a la escontra duna pastera de cerulosa, Botnia, allugada a la oriella oriental del Ríu Uruguai, a menos de 400 m del país. La sida, que nun son a aparar de golsiar, ye qu'Uruguai nun tien drechu nengún a "contaminar" a los arxentinos.
Fasta ehí, tou nun sal de lo "normal". Magüer, el problema ta en que los arxentinos nun han una, dos o tres plantes de cerulosa a la oriella del ríu, tienin TRENTA. Otra paradoxa ye qu'éstes plantes qu'han los arxentinos costruyéronse en tiempos de la dictadura, y nun han la teunoloxía de reciclaxe que pusúen les uruguayes d'anguaño. Les consecuencies, contaminación de residuos químicos nes augües au afáyense les más de les plantes arxentines, nel ríu Paraná y Uruguay. Los paraguayos (quiciabes perque munchos deben ser guaranís, indíxenes ya inferiores pa los peronistes) malapenes protesten, y nun digamos de los uruguayos, que motivos tienen (sobremanera coles averaes y pelligroses centrales nucleares d'Atucha).

Arriendes, fai poco, la mio moza, uruguaya, mentábame con enoxu cómo los arxentinos aconceyábense a la escontra duna pastera de prósima costruición nel interior del departamentu de Colonia, du ella ye. Pa más inri, l'envís de la manifestación yera pa "facer ver a los uruguayos cómo son quien a ganar más col turismu arxentino que coles pasteres", a lo qu'entainó a retrucar "¡Y amás van decinos cómo alministrar la nuesa economía¡".

La cosa nun fina ehí, ponen d'exemplu de contaminación, nun les sos pasteres, ensinon les de Pontevedra y Navia, igual d'obsoletes que les arxentines...

Mas, énte tóu esto. Camentamos, ¿cuála ye la braera custión? La pastera pola que glayen tanto había como posible allugamientu Sante Fe, Arxentina. Amás, la política'l gobiernu d'Uruguay nun ye producir tanta cantidá papel, ensinon facelo de mayor calidá, poro de más demanda. El resultáu foi que munchos papeleros cháron-y el güeyu a Uruguai no tocante a les inversiones y eso a la mazcayada Kirchner nun-y fexo tanta gracia. Otru datu, los cabezaleros de les movilizaciones almitieron escaradamente tar pagaos, dende llueu, dedicase a facer manifestaciones nunca foi un llabor remuneráu n'Arxentina, polo menos fasta güei.

Asina, mientres el pueblu ta pabesu col tema de les papeleres, nun sollerta les custiones braeramente importantes (les fuelgues de tresportistes y ganaderos, la inflación, el desemplegu, etc...). La mafia Kirchner percanció atropa un "nemicu" pequeñu y xinclín, los malvaos uruguayos. De fechu, camiento, que deberíen tomar exemplu d'Uruguai (abúltame que'l país menos podre política y económicamente) qu'algamó pagar dafechu la delda esterna, que tien una tasa d'inflación abondo baxa en comparancia con Arxentina y ha un gobiernu, d'el Frente Amplio, d'esquierdes y cola tiesta nel so sitiu, dalgo que nun se pue dicir d'otros tantos en Sudamérica (nin n'Europa). La única piega, quiciabes que los paisanos qu'emigren fuera (cuasi siempres mozos) nun tengan el drechu de votar, d'escoyer el futuru del so país, al que carpien y contribuyen. ¿Vos suena de dalgo?